နယ်စပ်ဒေသ၊ သမ/ကျေးလက်နှင့် တိုင်းဧရာတို့သည်
နယ်စပ်ဒေသ၊ သမ/ကျေးလက်နှင့် တိုင်းဧရာတို့သည်
ရခိုင်ပြည်နယ်အစိုးရအဖွဲ့ | Jun 28, 2022
မက်မန်းမြို့က ဖုန်းခေါ်သံ
“ဟဲလို…..အဘရေ ကျွန်တော်ကိုဗလပါဗျ”
ဇွန်လ ၁၇ ရက်နေ့ နံနက်ခင်းမှာ ကျွန်တော့်ထံသို့ အစောဆုံးဝင်ရောက်လာသော ဖုန်းခေါ်သံ ဖြစ်သည်။ ဖုန်းဆက်သူမှာ ‘ဝ’ကိုယ်ပိုင်အုပ်ချုပ်ခွင့်ရတိုင်း၊ မက်မန်းမြို့တွင် နေထိုင်သော ကိုဗလဖြစ်သည်။ သူ့နာမည်ရင်းက ကိုမိုးခိုင်၊ သို့သော် မည်သူကမျှ ကိုမိုးခိုင်ဟု မခေါ်၊ မက်မန်းနှင့် ကျိုင်းတုံဒေသတစ်ခုလုံး သူ့ကို သိသမျှလူတွေက ကိုဗလဟုပဲ ခေါ်ကြ သည်။ ခေါ်၍သာ ခေါ်နေကြသည် ဗလကောင်းကောင်း ထောင်ထောင်မောင်းမောင်းလည်း မဟုတ်ပြန်ပါချေ။ သေးသေးညှက်ညှက်လေးဖြစ်၏။ Nick Name ဟူ၍ပဲ ဆိုကြပါစို့ရဲ့။
“မှတ်မိပါတယ် ကိုဗလရဲ့ ပြောပါဗျ”
“မက်မန်းအထက်တန်းကျောင်းက အယောက် ၂၀ အောင်တယ် အဘရေ”
“ဟာ ဟုတ်လား၊ ဝမ်းသာတယ်ဗျာ၊ ဂုဏ်ထူးတွေရော ထွက်ကြတယ်မို့လား”
“၆ ယောက်က ဂုဏ်ထူးတစ်ဘာသာစီပါတယ်ဗျ”
သူဖုန်းဆက်ပြီး မကြာမီမှာပင် မက်မန်းမြို့ အထွေထွေအုပ်ချုပ်ရေးဦးစီးဌာန၊ အုပ်ချုပ် ရေးမှူး ဦးထွန်းလင်းအောင်က ဆက်လာပြန်သည်။ ဦးထွန်းလင်းအောင်သည် ပြည်ထောင်စု တိုင်းရင်းသားလူငယ်များ စွမ်းရည်ဖွံ့ဖြိုးရေးဒီဂရီကောလိပ်(ရန်ကုန်) အမှတ်စဉ် (၁) ကျောင်း ဆင်းဖြစ်သည်။ ထို့ပြင်တဝ သူသည် ပရဟိတ(ကျား)ကျောင်းထွက်၊ ‘ဝ’တိုင်းရင်းသားတစ်ဦး ဖြစ်နေ၍ လေးမျက်နှာပရဟိတကျောင်းထွက် ကျွန်တော်နှင့်လာ၍ ရေစက်ကဆုံနေပြန်ပါသည်။