ဒုတိယဝန်ကြီး ဦးမင်းထိန် ဧရာဝတီတိုင်းဒေသကြီးအတွင်းရှိ လမ်း၊ တံတားလုပ်ငန်းများ ကြည့်ရှုစစ်ဆေး

ဒုတိယဝန်ကြီး ဦးမင်းထိန် ဧရာဝတီတိုင်းဒေသကြီးအတွင်းရှိ လမ်း၊ တံတားလုပ်ငန်းများ ကြည့်ရှုစစ်ဆေး

နေပြည်တော် ဧပြီ ၂၆

ဆောက်လုပ်ရေးဝန်ကြီးဌာန ဒုတိယဝန်ကြီး ဦးမင်းထိန်သည် ဌာနဆိုင်ရာ တာဝန်ရှိသူများနှင့် အတူ ဧပြီ ၂၄ ရက် နံနက်ပိုင်းတွင် ပုသိမ်ခရိုင် ငပုတောမြို့နယ်ရှိ ခွဲကျောက် အမာခံခင်းခြင်းလုပ်ငန်း ဆောင်ရွက်နေသည့် ဇီးချိုင်-ကံချိုင်လမ်း လုပ်ငန်းဆောင်ရွက်နေမှုအခြေအနေကို ကြည့်ရှုစစ်ဆေးပြီး ရေရှည်တည်တံ့ခိုင်မြဲရေး ပြင်ဆင်ထိန်းသိမ်းခြင်းနှင့် အဆင့်မြှင့်တင်ခြင်းလုပ်ငန်းများ စဉ်ဆက်မပြတ် ဆောင်ရွက်သွားရန် မှာကြားသည်။

ဒုတိယဝန်ကြီးသည် ဧပြီ ၂၅ ရက် နံနက်ပိုင်းတွင် ပုသိမ် - ကံကုန်း - မြင်းကဆိပ် - မြောင်းမြလမ်းပေါ်ရှိ ပမ္မဝတီတံတား (မြင်းကဆိပ်) အဆင့်မြှင့်တင် တည်ဆောက်ခြင်းလုပ်ငန်း ဆောင်ရွက်နေမှုကို ကြည့်ရှုစစ်ဆေးသည်။

အဆိုပါတံတားသည် ပုသိမ် - ကံကုန်း -မြင်းက ဆိပ် - မြောင်းမြလမ်း ပမ္မဝတီမြစ်ပေါ်တွင် တည်ရှိ၍ တံတားအရှည် ပေ ၁၂၆၀၊ တံတားအကျယ် ၃၁ ပေ၊ ယာဉ်သွားလမ်း အကျယ် ၂၄ ပေ၊ ရေလမ်းကင်းလွတ် အကျယ်ပေ ၂၀၀၊ ရေလမ်းကင်းလွတ် အမြင့်ပေ ၂၀၊ ယာဉ်တစ်စီးချင်းခံနိုင်ဝန် တန် ၆၀ ဖြစ်သည်။

ဆက်လက်၍ ဒုတိယဝန်ကြီးနှင့်အဖွဲ့သည် လပွတ္တာ - သဲဖြူလမ်း၊ လပွတ္တာ - သင်္ကန်းကြီး - ပြင်စလူလမ်းပေါ်ရှိ မရမ်းချောင်းတံတား၊ ဘိုကလေး- စက်ဆန်း - ထော်ပိုင် - အမာလမ်း(ဘိုကလေး - စက်ဆန်းလမ်းပိုင်း) ဘုရားချောင်းမြစ်ပေါ်တွင် တံတားအထူးအဖွဲ့(၁၆)မှ တာဝန်ယူတည်ဆောက် လျက်ရှိသည့် ဘုရားချောင်းတံတား၊ ဖျာပုံ _ ကျုံကဒွန်း_ ဒေါ်ညိမ်း _ အမာလမ်းပေါ်တွင် တံတားအထူးအဖွဲ့ (၁၀)မှ တာဝန်ယူဆောင်ရွက်လျက်ရှိသော ဒေးဒလူ တံတားတည်ဆောက်ရေးလုပ်ငန်းခွင်များကို ကြည့်ရှု စစ်ဆေးပြီး လုပ်ငန်းများ သတ်မှတ်ချိန်အတွင်းပြီးစီးရေး တာဝန်ရှိသူများက ကြပ်မတ်ဆောင်ရွက်သွားရန် မှာကြားသည်။

ဒေးဒလူတံတားသည် တံတားအရှည်ပေ ၈၇၀၀၊ တံတားအကျယ် ၉ ဒသမ ၁၄၄ မီတာ၊ ယာဉ်သွားလမ်း အကျယ် ၇ ဒသမ ၃၁၆ မီတာ၊ လူသွားလမ်းအကျယ် (တစ်ဖက်လျှင်) သုည ဒသမ ၉၁၄ မီတာ၊ ရေလမ်း ကင်းလွတ်အမြင့် ၆ ဒသမ ၁ မီတာ၊ ရေလမ်းကင်း လွတ်အကျယ် ၁၅ ဒသမ ၉၈ မီတာ၊ ယာဉ်တစ်စီး ချင်းခံနိုင်ဝန်မှာ တန် ၆၀ ဖြစ်ကြောင်း သိရသည်။

သတင်းစဉ်