ပြည်ထောင်စုသမ္မတမြန်မာနိုင်ငံကုန်သည်များနှင့်စက်မှုလက်မှုလုပ်ငန်းရှင်များအသင်းချုပ်(၂၉)ကြိမ်မြောက်၊ နှစ်ပတ်လည်အသင်းသားစုံညီအစည်းအဝေးတွင်နိုင်ငံတော်၏ အတိုင်ပင်ခံပုဂ္ဂိုလ် ပြောကြားသည့် ဗီဒီယိုမိန့်ခွန်း

ပြည်ထောင်စုသမ္မတမြန်မာနိုင်ငံကုန်သည်များနှင့်စက်မှုလက်မှုလုပ်ငန်းရှင်များအသင်းချုပ်(၂၉)ကြိမ်မြောက်၊ နှစ်ပတ်လည်အသင်းသားစုံညီအစည်းအဝေးတွင်နိုင်ငံတော်၏ အတိုင်ပင်ခံပုဂ္ဂိုလ် ပြောကြားသည့် ဗီဒီယိုမိန့်ခွန်း

ပြည်ထောင်စုသမ္မတမြန်မာနိုင်ငံကုန်သည်များနှင့်စက်မှုလက်မှုလုပ်ငန်းရှင်များအသင်းချုပ်(၂၉)ကြိမ်မြောက်၊ နှစ်ပတ်လည်အသင်းသားစုံညီအစည်းအဝေးတွင်နိုင်ငံတော်၏ အတိုင်ပင်ခံပုဂ္ဂိုလ် ပြောကြားသည့် ဗီဒီယိုမိန့်ခွန်း

(၂၀၂၀ ပြည့်နှစ်၊ ဒီဇင်ဘာလ ၂၀ ရက်)

ဒီကနေ့ အခမ်းအနားကို တက်ရောက်လာတဲ့ ဧည့်သည်တော်များအားလုံးကို  နှလုံး စိတ်ဝမ်း အေးချမ်းကြပါစေလို့ ဆုတောင်း မေတ္တာ ပို့ပါတယ်။

ဒီကနေ့ကတော့ ပြည်ထောင်စုသမ္မတ မြန်မာနိုင်ငံကုန်သည်များ နှင့်စက်မှုလက်မှု လုပ်ငန်းရှင်များအသင်းချုပ် (UMFCCI)ရဲ့ (၂၉)ကြိမ် မြောက်၊ နှစ်ပတ်လည် အသင်းသားစုံညီ အစည်းအဝေးပဲ ဖြစ်ပါတယ်။

အားလုံးသိထားပြီး ဖြစ်တဲ့အတိုင်း ပုဂ္ဂလိကကဏ္ဍဟာ နိုင်ငံတော် စီးပွားရေးရဲ့ အဓိကကျတဲ့ မောင်းနှင်မှုတစ်ရပ်ပဲ ဖြစ်ပါတယ်။ UMFCCI အနေနဲ့ ပုဂ္ဂလိကကဏ္ဍကို ဦးဆောင်ပြီး နိုင်ငံတော်နဲ့ ပြည်သူလူထုအတွက် တက်တက်ကြွကြွ ပူးပေါင်းဆောင်ရွက် ပါဝင် ကြတဲ့အတွက် အထူးတန်ဖိုးထားပါကြောင်း ပဏာမအနေနဲ့ ပြောချင်ပါတယ်။

ဒီကနေ့ နိုင်ငံတော်က ကြိုးပမ်းဆောင်ရွက်နေတဲ့ အသေးစား၊ အငယ်စားနဲ့အလတ်စား စီးပွားရေးလုပ်ငန်းတွေ ဖွံ့ဖြိုးတိုးတက်ဖို့၊ မြန်မာ့ စီးပွားရေးလုပ်ငန်းတွေကို ပြည်တွင်းမှာ သာမက နိုင်ငံတကာ ဈေးကွက် တွေအထိပါ ဖြန့်ကျက် ထိုးဖောက်နိုင်ဖို့၊ ဒီဂျစ်တယ် စီးပွားရေးစနစ် ဖွံ့ဖြိုး တိုးတက်စေဖို့၊ အဂတိလိုက်စားမှု တိုက်ဖျက်နိုင်ဖို့ စတဲ့ လုပ်ငန်းတွေ မှာ တစ်တပ်တစ်အား ပါဝင်ဆောင်ရွက်ခဲ့တာတွေကို မှတ်တမ်း တင်အပ်ပါတယ်။

အခုလို COVID-19 ကပ်ရောဂါကာလမှာ ကပ်ရောဂါ ကာကွယ် ထိန်းချုပ်၊ ကုသရေး လုပ်ငန်းစဉ်တွေအပြင် စားနပ်ရိက္ခာ လှူဒါန်းခြင်း၊ ကုန်ဈေးနှုန်း ထိန်းချုပ်ခြင်း၊ ကုန်ပစ္စည်းများ မပြတ်လပ်အောင် ဆောင်ရွက်ပေးခြင်း စတဲ့ လုပ်ငန်းတွေကိုလည်း UMFCCI နဲ့ ညီနောင် အသင်း အဖွဲ့တွေက သက်ဆိုင်ရာကဏ္ဍအသီးသီးက ပံ့ပိုး ကူညီဆောင် ရွက် ပေးခဲ့တာတွေက လည်း ကျွန်မတို့ရဲ့ ပြည်သူလူထုအတွက် အထောက်အကူ ဖြစ်စေခဲ့ပါတယ်။ ဒီလို ကောင်း မြတ်တဲ့ အစဉ်အလာတွေကို ဆက်လက်ထိန်းသိမ်းထားပြီး  နိုင်ငံတော်ရဲ့ အရေးကိစ္စမှန်သမျှ ကို အစိုးရ-ပုဂ္ဂလိက ပူးပေါင်းဆောင်ရွက်မှုတွေ ပိုမိုမြှင့်တင် ကြိုးပမ်းသွားကြဖို့ တိုက်တွန်း ပြောကြားလိုပါတယ်။

ကျွန်မတို့ နိုင်ငံအနေနဲ့ Covid-19 ကပ်ရောဂါကြောင့် စိန်ခေါ်မှုတွေ ကြုံတွေ့နေရပေ မယ့်လည်း စီးပွားရေးနဲ့ ဖွံ့ဖြိုးရေးအတွက် အလား အလာကောင်းတွေ ရှိနေတုန်းပါပဲ။ ကျွန်မတို့နိုင်ငံ တည်ရှိနေတဲ့ အာရှဒေသဟာ စီးပွားရေး ဖွံ့ဖြိုးတိုးတက်မှု အမြန်ဆုံးဒေသတွေ ထဲမှာ ပါဝင်နေခဲ့ပါတယ်။ စီးပွားရေးဖွံ့ဖြိုးတိုးတက်တဲ့ နိုင်ငံတွေလို့ ဆိုရာမှာ ဖွံ့ဖြိုးပြီး အနောက်နိုင်ငံတွေကိုပဲ အများစု ညွှန်းဆိုလေ့ ရှိခဲ့ကြပေမယ့် အာရှဒေသ အတွင်းမှာလည်း  ဖွံ့ဖြိုးတိုးတက်မှုတွေ အမှန်တကယ် ဖြစ်ပေါ်နေပါပြီ။ အာရှဒေသထဲက မြန်မာနိုင်ငံအနေနဲ့ လည်း တိုးတက်မှုတွေ ဖြစ်ပေါ် ရရှိ လာခဲ့ပါတယ်။  

ဒီလိုမျိုး တိုးတက်မှုတွေ ရရှိလာခဲ့တာကို ပြန်ကြည့်ရင် အဝတ် အထည်နဲ့ ချည်ထည်လိုမျိုး လုပ်သားအခြေပြု ကုန်ထုတ်လုပ်ငန်းတွေ၊ ပို့ကုန် အခြေပြု ကုန်ထုတ် လုပ်ငန်းတွေကြောင့် ဖြစ်တာကို တွေ့ရှိရ ပါတယ်။ ဒေသတွင်းနိုင်ငံတွေမှာ ကုန်ထုတ် လုပ်ငန်းတွေ ဆောင်ရွက်ကြရာမှာ ကုန်ကျစရိတ် မြင့်တက်လာမှုကြောင့် ရင်းနှီးမြုပ်နှံသူတွေ ဟာ ကုန်ပစ္စည်းတွေ ထုတ်လုပ်နိုင်ဖို့ ပိုပြီး ကောင်းမွန်တဲ့ နေရာဒေသတွေကို ရွေးချယ်လာ ကြပါတယ်။ ကျွန်မတို့ နိုင်ငံရဲ့ မဟာဗျူဟာကျကျ တည်ရှိမှု နဲ့ အာရှဒေသ အတွင်း စီးပွားရေးဖွံ့ဖြိုးတိုးတက်လျက်ရှိတဲ့ နိုင်ငံတစ်နိုင်ငံ အဖြစ် ရပ်တည်နေမှု စတဲ့ ကောင်းမွန်တဲ့ လက္ခဏာရပ်တွေကြောင့် မလွဲမသွေ ရွေးချယ် ရင်းနှီးမြှုပ်နှံရမယ့် နေရာဒေသတစ်ခုအဖြစ် ထည့်သွင်း စဉ်းစားလာကြမှာ ဖြစ်ပါတယ်။ ဒါပေမယ့် ကျွန်မတို့နိုင်ငံဖက်ကလည်း ရင်းနှီး မြုပ်နှံမှုတွေ စီးဝင်လာအောင် အခြေအနေကောင်းတွေ ဖန်တီးပေးနိုင်ဖို့ အရေးကြီးပါတယ်။

ဒါ့ကြောင့်လည်း နိုင်ငံတော်အစိုးရအနေနဲ့ တာဝန်ယူမှုရှိပြီး အရည်အသွေး ပြည့်ဝ ရုံသာမက စဉ်ဆက်မပြတ် ဖွံ့ဖြိုးတိုးတက်မှုကို အထောက် အပံ့ဖြစ်စေမယ့် နိုင်ငံခြား တိုက်ရိုက်ရင်းနှီးမြှုပ်နှံမှုတွေကို ဆွဲဆောင်နိုင်ဖို့  ပွင့်လင်းမြင်သာ၊ ရိုးရှင်းလွယ်ကူ၊ ကြိုတင် ခန့်မှန်းနိုင်ပြီး ယှဉ်ပြိုင်နိုင်စွမ်းရှိတဲ့ ရင်းနှီးမြှုပ်နှံမှု ပတ်ဝန်းကျင်ကောင်းတစ်ရပ်ကို ဖော်ဆောင်ပေးနိုင်ဖို့  ကြိုးပမ်းဆောင်ရွက်ခဲ့တာ ဖြစ်ပါတယ်။ ဒီလို ကြိုးပမ်းဆောင်ရွက်ခဲ့ တာတွေရဲ့ ရလဒ်ကောင်းအဖြစ်  ကမ္ဘာ့ဘဏ်က ထုတ်ပြန်ခဲ့တဲ့ စီးပွားရေး လုပ်ကိုင်ရာမှာ လွယ်ကူချောမွေ့မှု ဆောင်ရွက်နိုင်မှု အစီရင်ခံစာ (၂၀၂၀) မှာ မြန်မာနိုင်ငံရဲ့ “စီးပွားရေး လုပ်ဆောင်ရာတွင် လွယ်ကူချောမွေ့မှု  ဆောင်ရွက်နိုင်မှု အဆင့်” ကို အရင်နှစ်က အဆင့် (၁၇၁) သတ်မှတ်ခဲ့ရာ ကနေ ဒီမှာတော့ (၁၆၅) အဖြစ် သတ်မှတ်ခံခဲ့ရပါတယ်။ အဆင့် (၆) ဆင့်တိုး တက်လာခဲ့တဲ့အပြင် တိုးတက်မှုအရှိဆုံး နိုင်ငံ(၂၀) စာရင်းမှာလည်း ပါဝင်လာခဲ့ပါ တယ်။

အခု ဘဏ္ဍာရေးနှစ်အတွင်း ပြည်ပတိုက်ရိုက်ရင်းနှီးမြှုပ်နှံမှု စီးဝင်မှု မှာ အမေရိကန် ဒေါ်လာ ၅ ဒသမ ၇ ဘီလီယံနီးပါး ရှိတဲ့အတွက် မြန်မာ့ ရင်းနှီး မြှုပ်နှံမှုမြှင့်တင်ရေး စီမံကိန်း (MIPP)အရ ဒီနှစ် မျှော်မှန်းချက်ရဲ့ ၉၈ ရာခိုင်နှုန်း နီးပါး ရရှိပြီး ဖြစ်ပါတယ်။ လက်ရှိအချိန်မှာ လည်း ဒေသတွင်း က ဂျပန်၊ ထိုင်း၊ တောင်ကိုရီးယားနဲ့ စင်ကာပူလိုမျိုး မိတ်ဖက်နိုင်ငံတွေက နေ ရင်းနှီးမြှုပ်နှံမှုတွေ ပိုမိုစီးဝင်နေပြီး အမေရိကန်နဲ့ ဥရောပ နိုင်ငံတွေရဲ့ရင်းနှီး မြှုပ်နှံမှုတွေ လည်း ဆက်လက်ဝင်ရောက်နေဆဲ ဖြစ် ပါတယ်။

Covid-19 အလွန် အစိုးရ-ပုဂ္ဂလိက ပူးပေါင်းဆောင်ရွက်မှု ခိုင်မာ အား ကောင်း ရေး

ကျွန်မတို့ နိုင်ငံအနေနဲ့ စိန်ခေါ်မှုတွေ၊ အခက်အခဲတွေနဲ့ ကြုံတွေ့ နေရတဲ့ အခုလို ကပ်ရောဂါကာလမှာ အစိုးရ-ပုဂ္ဂလိက ကဏ္ဍ နှစ်ရပ်ရဲ့ စစ်မှန် ခိုင်မာတဲ့ ပူးပေါင်းဆောင်ရွက် မှုတွေ  ဒီထက်ပိုပြီး မြှင့်တင်ဖို့ လိုအပ်ပါတယ်။ Covid-19 ကပ်ရောဂါဟာ ကျွန်မတို့အားလုံးရဲ့ ရောင်းဝယ်မှု ပုံစံတွေ၊ ကုန်ပစ္စည်း ထုတ်လုပ်မှုပုံစံတွေကို ပြောင်းလဲသွား စေခဲ့ပါတယ်။ ဒါ့ကြောင့် Covid-19 အလွန် အနာဂတ်ကာလမှာ ကျွန်မတို့ ပုံဖော်တည်ဆောက်ချင်တဲ့ စီးပွားရေးဝန်းကျင်တစ်ရပ်ကို ဖော်ဆောင် နိုင်ဖို့အတွက် လိုအပ်တဲ့ အစီအမံတွေကို အလေး ပေး ဦးတည်ဆောင်ရွက် ကြဖို့ ပိုပြီး အရေးကြီးလာပြီ ဆိုတာကို ပြောချင်ပါတယ်။

အမျိုးသမီးများ ဦးဆောင်သော အသေးစား၊ အငယ်စား၊ အလတ်စား စီးပွားရေး လုပ်ငန်းများ ဖွံ့ဖြိုးတိုးတက်ရေး

အမျိုးသမီး စီးပွားရေးလုပ်ငန်းရှင်တွေအတွက် လုပ်သာကိုင်သာရှိ တဲ့ စီးပွားရေး ဝန်းကျင်ကောင်းတစ်ရပ် ဖန်တီးပေးနိုင်ရေးဟာ COVID-19 အလွန်မှာ  ပိုပြီး အရေးပါလာ၊ ရှေ့တန်းရောက်လာတော့မှာ ဖြစ်ပါတယ်။

ကမ္ဘာတစ်ဝန်းမှာ နှစ်စဉ်ကျင်းပလေ့ရှိတဲ့ “အမျိုးသမီးများအပေါ် အကြမ်းဖက်မှု ပပျောက်ရေး ၁၆ ရက်တာကာလလှုပ်ရှားမှု” ကို အသိအမှတ်ပြု ဂုဏ်ပြုတဲ့အနေနဲ့ အခုလို COVID-19 ကာလအတွင်းမှာ  အမျိုးသမီးတွေ ဦးဆောင်ပါဝင်တဲ့ အသေးစား၊ အငယ်စားနဲ့ အလတ်စား စီးပွားရေး လုပ်ငန်းတွေ တည်ထောင်နိုင်ဖို့၊ လုပ်ငန်းတွေ ချဲ့ထွင်ဆောင်ရွက်နိုင်ဖို့ အတွက် လိုအပ်တဲ့ ပံ့ပိုးကူညီမှုတွေ ဆောင်ရွက်ပေးကြဖို့ အလေးထား ပြောကြားလိုပါတယ်။ ဒီလိုမျိုး အရေးပါတဲ့ ပံ့ပိုးကူညီမှုတွေကို လက်ရှိ အခြေအနေမှာ မြန်မာစီးပွားရေးလုပ်ငန်းရှင် အမျိုးသမီးများ ကွန်ယက် က ဆောင်ရွက်ပေးနေတာတွေကိုလည်း အားရမိပါတယ်။

ရင်းနှီးမြှုပ်နှံမှုနှင့် နိုင်ငံခြားစီးပွားဆက်သွယ်ရေး ဝန်ကြီးဌာနက ထုတ်ပြန်ခဲ့တဲ့ ဒုတိယ အကြိမ် မြန်မာ့ရင်းနှီးမြှုပ်နှံမှုမူဝါဒ သုံးသပ်ချက်မှာ ကမ္ဘာ့ဘဏ်ရဲ့ စီးပွားရေးလုပ်ငန်း တွေများစွာ ဆောင်ရွက်ရာမှာ လွယ်ကူချော မွေ့စွာ ဆောင်ရွက်နိုင်မှု အဆင့်သတ်မှတ်ချက် တွေအနက်  “စီးပွားရေး လုပ်ငန်းတစ်ခု စတင်နိုင်မှု အဆင့်သတ်မှတ်ချက်” ကို မြန်မာနိုင်ငံ အနေနဲ့ အဆင့် (၁၇၀) ကနေပြီးတော့ အဆင့် (၇၀) အထိ တိုးတက်ရရှိအောင် ၄ နှစ် အတွင်း ဆောင်ရွက်နိုင်ခဲ့ပြီး အရှိန်အဟုန်မြင့် တိုးတက်မှုများ ရရှိခဲ့ ကြောင်း ဖော်ပြထား ပါတယ်။

မကြာခင် ထွက်ပေါ်လာတော့မယ့် “မြန်မာ့စီးပွားရေး ထိခိုက်မှုဒဏ် ခံနိုင်ရေး ပြုပြင် ပြောင်းလဲမှု စီမံချက်” (MERRP)မှာလည်း ကျား၊ မ တန်းတူ ညီမျှမှု ရှိစေရေးနဲ့ နိုင်ငံစီးပွားရေး ပြုပြင်ပြောင်းလဲရေး လုပ်ငန်းစဉ် တွေ ဖော်ဆောင်ရာမှာ အမျိုးသမီးတွေရဲ့ အရေးပါတဲ့ ပူးပေါင်း ပါဝင်မှု အခန်းကဏ္ဍကို အလေးထားပြီး ထည့်သွင်း ချမှတ်သွားမှာ ဖြစ်ကြောင်း ပြောကြားလိုပါတယ်။

ဒီဂျစ်တယ်စနစ် အသွင်ကူးပြောင်းမှုနှင့် ဒေသတွင်းဘက်စုံစီးပွားရေး ပူးပေါင်း ဆောင်ရွက်မှု (RCEP)

COVID-19 ရောဂါဟာ ဒီဂျစ်တယ်စနစ် အသွင်ကူးပြောင်းမှုကို အရှိန်အဟုန်မြှင့် ဆောင်ရွက်နိုင်ဖို့ လိုအပ်ချက်နဲ့ ဒီဂျစ်တယ်စနစ်ရဲ့ အရေးပါမှုကို မီးမောင်းထိုး ပြသနေပါ တယ်။ ဒီဂျစ်တယ်စနစ် အသွင်ကူးပြောင်းမှု ဆောင်ရွက်တဲ့အခါ ကြိုတင်ပြင်ဆင်ဆောင် ရွက်နိုင်မှုနဲ့ စွမ်းဆောင်ရည်တွေဟာ ကျွန်မတို့နိုင်ငံရဲ့ ကာလရှည်ကြာ အောင်မြင်မှု အတိုင်း အတာကို အဆုံးအဖြတ် ပေးနိုင်မယ့် အချက်တစ်ခုလည်း ဖြစ် ပါတယ်။

အခုလိုဆိုရင် ပိုမိုမြန်ဆန်တဲ့ ဒီဂျစ်တယ်စနစ်အသွင်ကူးပြောင်းမှုကို အကောင်အထည် ဖော်နိုင်ဖို့အတွက် အစိုးရနဲ့ ပြည်သူတွေအကြား၊ အစိုးရနဲ့ စီးပွားရေးလုပ်ငန်းတွေအကြား၊ စီးပွားရေးလုပ်ငန်းတစ်ခုနဲ့ တစ်ခု အကြား၊ ပြည်သူတစ်ဦးနဲ့တစ်ဦးအကြား ကုန်ပစ္စည်းနဲ့ ဝန်ဆောင်မှု တွေကို ဝယ်လိုအားနဲ့ ရောင်းလိုအားနဲ့အညီ ဒီဂျစ်တယ် နည်းပညာတွေ သုံးပြီး ရောင်းဝယ်၊ ငှားရမ်း၊ ဖလှယ်နိုင်ရေးအတွက် တစ်ခုတည်းသော ဒီဂျစ်တယ်ပလက်ဖောင်း စနစ်ကို နိုင်ငံတော်က ဦးစီးပြီး ပုဂ္ဂလိက စီးပွားရေး အဖွဲ့အစည်းများနဲ့ ပေါင်းစပ် အကောင် အထည်ဖော်ဖို့ ဆောင် ရွက်နေပါတယ်။

ဒေသတွင်း နိုင်ငံအများစု အနေနဲ့ ဒီဂျစ်တယ်စီးပွားရေးစနစ်ကို ကူးပြောင်းနေကြပြီ ဖြစ်ပေမယ့် ကျွန်မတို့ရဲ့ အသေးစား၊ အငယ်စားနဲ့ အလတ်စား စီးပွားရေးလုပ်ငန်း အများစုကတော့ နောက်ကျကျန်ရစ် ခဲ့နေဆဲပဲ ဖြစ်ပါတယ်။ ဒါ့ကြောင့် မြန်မာ့ အသေးစား၊ အငယ်စားနဲ့ အလတ် စား စီးပွားရေးလုပ်ငန်းတွေအနေနဲ့ ဒီဂျစ်တယ်နည်းပညာတွေ အသုံးပြု ပြီး နိုင်ငံတကာကို လုပ်ငန်းတွေ ချဲ့ထွင်သွားကြဖို့လည်း တိုက်တွန်း ပြော ကြားလိုပါတယ်။

 ထိရောက်မှု ရှိပြီး မှန်ကန်ကောင်းမွန်တဲ့ ပံ့ပိုးမှုတွေ၊ ပူးပေါင်း ဆောင်ရွက်မှုတွေနဲ့ မြန်မာ့အသေးစား၊ အငယ်စားနဲ့ အလတ်စား စီးပွားရေး လုပ်ငန်းတွေဟာ ၂၁ ရာစု ဒီဂျစ်တယ် နည်းပညာအသစ်တွေ ကို အသုံးပြုပြီး နိုင်ငံတကာကို ဖြန့်ကျက် ထိုးဖောက်နိုင်ဖို့လည်း ကျွန်မအနေနဲ့ မျှော်လင့်ပါတယ်။ ပုဂ္ဂလိကလုပ်ငန်းရှင်တွေအနေနဲ့ ဈေးကွက် ဖြန့်ချိရာမှာ ကြုံတွေ့နေရတဲ့ အခက်အခဲတွေကို ကျော်လွှားနိုင်ဖို့ နိုင်ငံတော်အစိုးရအပိုင်းက တတ်စွမ်း သမျှ ကူညီဆောင်ရွက်ပေးသွားမှာလည်း ဖြစ်ပါတယ်။

ပြီးခဲ့တဲ့ နိုဝင်ဘာလ ၁၅ ရက်နေ့က RCEP လို့ အများသိတဲ့ ဒေသတွင်း ဘက်စုံ စီးပွားရေး ပူးပေါင်းဆောင်ရွက်မှုစာချုပ်ကို ကျွန်မတို့နိုင်ငံ ပါဝင် လက်မှတ်ရေးထိုးခဲ့ပါတယ်။ ဒီစာချုပ်က ကမ္ဘာ့လူဦးရေရဲ့ ၃၀ ရာခိုင်နှုန်း ကျော်နဲ့ ကမ္ဘာ့စီးပွားရေး ပမာဏရဲ့ ၃၀ ရာခိုင်နှုန်း ၊ ကမ္ဘာ့ ကုန်သွယ်မှု ပမာဏရဲ့ ၂၉ ရာခိုင်နှုန်းကို ကိုယ်စားပြုတာကြောင့် ကမ္ဘာ့အကြီးဆုံး ကုန်သွယ်ရေး နယ်မြေတစ်ခုအဖြစ် တင်စားခေါ်ဝေါ်ကြပါတယ်။ ဒီနေ့ ခေတ် ပထဝီနိုင်ငံရေး အခြေအနေနဲ့၊ ကမ္ဘာ့ကုန်သွယ်မှု အခင်းအကျင်း တွေကို လေ့လာကြည့်မယ်ဆိုရင်၊ စီးပွားရေး အင်အားကြီး နိုင်ငံတွေ အကြား ကုန်သွယ်ရေး တင်းမာမှုတွေ ရှိနေသလို ကိုယ်ကျိုးစီးပွား ကာကွယ်တဲ့ အစီအစဉ်တွေကို ချမှတ်လုပ်ဆောင်နေတာကိုလည်း တွေ့မြင်ရမှာဖြစ်ပါ တယ်။ ဒါကြောင့် စည်းမျဉ်းအခြေခံတဲ့ နိုင်ငံစုံကုန်သွယ်မှုစနစ်  ပြန်လည်အား ကောင်းအောင် ဆောင်ရွက်ဖို့ အရေးတကြီး လိုအပ် နေတာဖြစ်ပါတယ်။ ဒီလို ကမ္ဘာ့စီးပွားရေးရဲ့ နောက်ခံ အနေအထားမှာ ကျွန်မတို့ နိုင်ငံလို စီးပွားရေးအင်အား သေးငယ်တဲ့ နိုင်ငံတစ်ခုအနေနဲ့ သီးခြား ရပ်တည်ပြီး နိုင်ငံတကာနဲ့ စီးပွားရေး ဆက်ဆံလုပ်ကိုင်ဖို့ အခက်အခဲတွေ အများကြီး ရှိပါတယ်။ RCEP ကို ဝင်ရောက်ခဲ့တဲ့အတွက် နိုင်ငံ့စီးပွားရေး ရဲ့ အဓိကမောင်းနှင်အားဖြစ်တဲ့ ပုဂ္ဂလိကကဏ္ဍ အကျိုးစီးပွားကို မြှင့်တင် ပေးနိုင်မယ်လို့ ယုံကြည်ထားပါတယ်။ စာချုပ်က ပေးတဲ့ အခွင့်အရေးတွေ ကို ပြည်သူတွေ လက်တွေ့ ခံစားရရှိလာအောင် အစိုးရနဲ့ ပုဂ္ဂလိက ကဏ္ဍ နှစ်ရပ် ဟန်ချက်ညီညီ၊ အင်အားကောင်းကောင်းနဲ့ ပူးပေါင်း ဆောင်ရွက် သွားကြဖို့ ပြောကြားလိုပါတယ်။

နိဂုံး

ကျွန်မတို့ ပြည်သူတွေရဲ့ လူမှု-စီးပွားဘဝ ဖွံ့ဖြိုးတိုးတက်ရေး အတွက် အစိုးရနဲ့ ပုဂ္ဂလိက အတူတကွ လက်တွဲ ပူးပေါင်း ဆောင်ရွက် သွားကြဖို့  အလေးအနက်ထား ထပ်လောင်း ပြောကြားလိုပါတယ်။ အခုလို အစိုးရ-ပုဂ္ဂလိက ကဏ္ဍနှစ်ရပ် ပူးပေါင်းဆောင် ရွက်မှုကို ပိုမို နက်ရှိုင်း ခိုင်မာစွာ တည်ဆောက်နိုင်မယ်ဆိုရင် အလုပ်အကိုင် အခွင့် အလမ်းသစ်တွေ၊ စီးပွားရေး ဆိုင်ရာ အခွင့်အလမ်းသစ်တွေ ဖော်ထုတ် ပေးနိုင်မှာ ဖြစ်ပြီး ရေရှည်တည်တံ့တဲ့ ဖွံ့ဖြိုးတိုးတက်မှု၊ သာယာဝပြောမှု တွေကို ကျွန်မတို့ ပြည်သူတွေအတွက် ဖော်ဆောင်ပေး နိုင်မယ်လို့လည်း ယုံကြည်ထားပါတယ်။

ဒီလို ဖော်ဆောင်ပေးဖို့အတွက်လည်း UMFCCI အနေနဲ့ ပုဂ္ဂလိက ကဏ္ဍ တိုးတက် ရေးအတွက် အသိပညာနဲ့ ကျွမ်းကျင်မှုတွေ ဖြန့်ဝေပေး တာတွေ၊ ဈေးကွက် ချိတ်ဆက် ဆောင်ရွက်ပေးတာတွေ၊ ဘဏ္ဍာငွေ အရင်းအမြစ် ပံ့ပိုးပေးတာတွေစတဲ့ လုပ်ငန်းစဉ်တွေ ကို ဆက်လက်ပြီး ဆောင်ရွက်ပေးကြဖို့ မေတ္တာရပ်ခံချင်ပါတယ်။

နိဂုံးချုပ်အနေနဲ့ ပြောလိုတာကတော့ “ပြည်ထောင်စုသမ္မတ မြန်မာနိုင်ငံ ကုန်သည် များနဲ့ စက်မှုလက်မှုလုပ်ငန်းရှင်များ အသင်းချုပ်” နဲ့ ညီနောင် အသင်းတွေက အသင်းဝင်တွေ အားလုံး ကျန်းမာကြပါစေ၊ အသင်းသား စုံညီ အစည်းအဝေးတွေမှာ မိမိတို့စီးပွားရေး လုပ်ငန်းတွေ အတွက်သာမက နိုင်ငံနဲ့ ပြည်သူတွေအတွက်ပါ လက်တွေ့ကျပြီး ထိရောက်တဲ့ ရှေ့လုပ်ငန်းစဉ်တွေ ချမှတ်နိုင်ကြပါစေ၊ အသင်းကြီးရဲ့ ရှေ့ဆက် ဆောင်ရွက်မယ့် လုပ်ငန်းစဉ် တွေမှာလည်း အောင်မြင်မှု ရလဒ် ကောင်းတွေ ရရှိပိုင်ဆိုင်နိုင်ကြပါစေလို့ ဆုမွန်ကောင်း တောင်းရင်း နိဂုံးချုပ်လိုက်ပါတယ်။

အားလုံးကို ကျေးဇူးတင်ပါတယ်။

၂၀၂၁ အတွက်လည်း ဆုမွန်ကောင်းတွေ အများကြီးတောင်းပြီးတော့ မေတ္တာပို့သ လိုက်ပါတယ်။