ပအိုဝ့်တိုင်းရင်းသားလူမျိုးများအကြောင်းသိကောင်းစရာ

ပအိုဝ့်တိုင်းရင်းသားလူမျိုးများအကြောင်းသိကောင်းစရာ

Ministry of Ethnic Affairs | Jun 28, 2022

 မြန်မာမင်းအုပ်ချုပ်ပုံစာတမ်း၊ စာမျက်နှာ(၃၀)၌ မြန်မာ (၇)မျိုးထဲတွင် မြန်မာ၊ ယော(ပရဲ)၊ ရခိုင်၊ ထားဝယ်၊ ပျူ၊ ကမ်းယံ၊ တောင်သူ ဟုရေတွက်ထားသည်ကို ထောက်လျှင် တောင်သူအမည်ခံခဲ့သော ပအိုဝ်းလူမျိုးသည် တိဗက်မြန်မာအုပ်စုတွင် ပါဝင်လိမ့်မည်ဟု ယူဆရပေသည်။ တိဗက်မြန်မာအုပ်စုတွင် မြန်မာ၊ သက်လိုလို၊ ကချင်၊ ချင်း၊ နာဂနှင့် ကရင် ဟုသတ်မှတ်ထားသည်။ ပအိုဝ်းကို ကရင်အုပ်စုတွင် ထည့်သွင်းထားသောကြောင့် တိဗက် မြန်မာအစုပင် ဖြစ်သည်ဟု ယူဆဖွယ်ရာရှိသည်။

          ဆာဂျေဂျော့စကော့( Sir J.George Scott )မှတ်တမ်းအရလည်း ပအိုဝ်းတိုင်းရင်း သားတို့သည် မြန်မာနိုင်ငံနယ်နိမိတ်အတွင်းဘက်မှသာလျှင်မကဘဲ ယိုးဒယား၊ ကမ္ဘောဒီး ယား မဲခေါင်မြစ်ဝှမ်းတောင်ပိုင်းဒေသတွင်လည်း ပြန့်ကျဲနေထိုင်လျက်ရှိကြောင်း ဖော်ပြထား သည်။

( Major Enrequeeze ) မေဂျာအင်ရီကွိဇ် ပြုစုသည့် မြန်မာနိုင်ငံလူမျိုးများ အကြောင်းစာအုပ်တွင်လည်း ကရင်သည် ထိုင်းတရုတ်အနွယ်မှ ဆင်းသက်သည်ဟုရေးသား ထားလေသည်။ ကရင်ဘဝ ဓလေ့စာအုပ်တွင် ပအိုဝ်းသည် ကရင်အနွယ်စုဖြစ်ပြီး ကရင်သည် ထိုင်းတရုတ်အုပ်စုမှ ဆင်းသက်လာသည်ဟု ရေးသားဖော်ပြထားသည်ကို တွေ့ရှိရပေသည်။ ထို့ကြောင့် အထက်ပါ ပညာရှင်များ၏ ယူဆချက်များကိုကြည့်လျှင် တောင်သူခေါ် ပအိုဝ်းတိုင်းရင်းသားတို့သည် တိဗက်မြန်မာအုပ်စုတွင် ပါဝင်သည်ဟုလည်း ကောင်း၊ ထိုင်းတရုတ်အုပ်စုတွင် ပါဝင်သည် ဟုလည်းကောင်း အယူအဆတွေကွဲပြားနေပေသည်။